بدون اسم !

لي فتره طويله ما كتبت في المدونه او فكرت اكتب ، بصراحه مدري احس اني اواجه صعوبه في الكتابه وايصال الافكار للطرف الاخر ايضاً حتى اني ما احب ادخل في نقاشات لاني بصراحه ما اعرف اقنع الطرف الاخر ابداً
فيه افكار وفيه كل شي بس لما يجي وقت الكتابه اواجه صعوبه وتاخذ مني وقت واتعيجز واسحب .! 
خصوصاً موضوع الوقت، الكتابه تاخذ مني وقت ودايم اقول عندي افكار وكذا وبكتبها بعدين وكل ما تذكرت اني راح اكتب واتعب اقول بعدين راح اسويها وعلى هذا المنوال آآجل الى مالا نهايه .. احس الكتابه موجهه لاشخاص معينين اللي يمتلكون الموهبه وليس الكل
عموماً راح احاول اثري محتوى المدونه من جديد وارجع لها  واعطيها وقتها ولو شي بسيط ، على الاقل لو احط ذكريات لي اتذكرها بعدين مرور الوقت لاني اجمل ما شفت في مدونتي اني ارجع لمواضيع قديمه واتذكر وقت كتابتي لها واقارن اسلوب كتابتي الحالي بالقديم والاحظ اخطائي وكذا
وبس هذا اللي كنت ودي اقوله ، شكراً لقرائتك ^_^ ..

Devil May Cry 5th Anniversary Collection - Unboxing

>


اول مره اسوي فيديو فلا تدققون واجد ، اول المقطع كنت مرتبك شوي بس الحمدلله عدت على خير
الموسيقى زرفتها او تقدرون تقولون اخترتها ع السريع من last.fm .. اتمنى يعجبك عملي :)

تعديل خط Gwibber ليناسب ستايلك الخاص

سلام عليكم

محد لاحظ غيري ان خط Gwibber كبير بزياده وماخذ مساحه على الفاضي ؟ المهم وانا قاعد ابحث عن حل في النت لقيت تدوينه حلوه واستعنت فيها بعد الله .. الطريقه بسيطه وراح تاخذ منك دقيقه بس :

افتح الترمنال والصق الامر التالي ثم اضغط انتر

gksudo gedit /usr/share/gwibber/ui/themes/ubuntu/main.css

راح يفتح لك مستند نصي وفيه بيانات .. في اول المستند يجب ان يكون كالتالي ( لاحظ التغير بين الكلام التالي وبين الكلام اللي في مستندك عشان تعرف وين تلصق الكلام )

* {
color: black;
font-size: 8pt;
font-family: Liberation Sans;
}

.imgbox {
-webkit-border-radius: 5px;
}

.tableBubble {
  width:100%;
}

بعدين اعمل حفظ للمستند ( save ) ثم اغلق النافذه ثم قم بتشغل Gwibber ولاحظ التغيير في الخط ..

بإمكانك تحط حجم الخط اللي تبيه في خانه font-size وتحط الخط اللي تبيه في خانه font-family
انا بالنسبه لي خليته حجم الخط 7 وطالع كيوت مره صغير :)

قبل

بعد

تقرير : تجربتي للشراء من الخارج من البدايه الى النهاية

سلام عليكم
التدوينه مقسمه لعده اقسام تسهيلاً لي وللقارئ بحيث بأمكانه قراءه ما يريد وترك ما يريد

فتح حساب في الراجحي :

قريت كثير ناس في المنتدى ( البوابه الرقمية ) يمدح في بنك الراجحي وسرعه فتحه للحساب واخراجه للفيزا .. بعد تجربتي لهم اتضح لي العكس تماماً .. اسرد لكم تجربتي من البدايه :

مريت لهم اول مره وانا ما عندي اي خلفيه عن فتح الحساب ولا آي شي .. مريت لمهم وسألت الموظف قالي لازم تخش الموقع وتعبي البيانات وتاخذ رقم الطلب اللي يجيك بعد ما تنتهي من عمليه تعبئه البيانات .. جيناهم اليوم الثاني وسألت الموظف قالي لازم من الساعه 9 الى 11 الصباح .. قلنا ما فيه مشكله جيناهم اليوم الثالث وعطيت رقم الطلب للموظف ودخله عنده بالكمبيوتر لكن العمليه ما نجحت الموظف يقول لي السستم عطلان حالياً تعال بكره .. جيناهم اليوم الرابع نفس المشكله السستم عطلان طلعت من نفس الفرع ورحت لفرع آخر ونفس المشكله السستم عطلان .. الموظف نفسه اللي في الفرع الآخر يقول تعال الاسبوع الجاي قلت طيب نصبر .. جيت الاسبوع القادم برقم طلب جديد ونفس المشكله يقولي السستم عطلان حاولت مع الموظف وبينت له المشكله وكذا وقالي تعال بعد الظهر واضبطك .. جيته بعد الظهر وبالفعل ضبطني ودخل البيانات الخاصه بي يدوياَ من خلال الكمبيوتر حقهم واخذ تقريبا حول النص ساعه واودعت في حسابي 100 ريال واستلمت البطاقه ..

اصدار بطاقه الفيزا مسبقه الدفع :

بعد ما فتحت حسابي في بنك الراجحي مباشرتاً توجهت للموظف وقلت له بقدم طلب لأصدار الفيزا لكن قالي لازم تصبر 24 ساعه لانك توك فاتح حساب .. جيتهم اليوم الثاني وكلمت الموظف وعبيت البيانات المطلوبه في الاستماره وقالي خلاص تعالي بكره .. جيتهم بكره الصبح وللاسف ما طلعت فيزتي قالي ما عليك تعال الظهر واضمن لك انها بتجيك .. جيته الظهر وبالفعل استلمت البطاقه وارتحت وخلصت منهم

طبعاً هالكلام صار معي في الفرع الموجود بالقرب من بيتنا اللي هم : العقيق ، الصحافه
وبالنسبه لنظامهم فيه اشياء ما سرتني مثل نظام موظفين الاستفسارت عندهم مافيه لا حجز ولا ارقام ولا شي .. تقعد وتحتري لين يقوم اللي في الكرسي مع الموظف وتروح لمه .. بعض الناس اللي يهديهم يجي متأخر ومطفي النور وعلطول يقعد ما يدري انه فيه ناس تحتري من زمان !
وبعض الموظفين الله يهديهم رافعن خشته يالله يتكلم معك واذا جيت تبي تستفسر منه ع السريع زبدلك وقالك اقعد .. يعني ما يعطيكياها بأسلوب ! .. طبعاً مب كلهم فيه ناس شفتهم حبيبن وخدموني وفيه بعضهم صارو يعرفون اخواني من زمان معنا في الحاره

فتح بريد مع اراميكس :

بعد ما طلعت فيزتي رحت اجرب اشترك في خدمه شيب آند شوب وتم الاشتراك معهم من خلال موقعهم الالكتروني ومن خلال الدفع بفيزتي اللي توني مطلعها .. تم الدفع مباشرتاً وتم الخصم من رصيدي وارسلولي رساله انهم استلموا فلوسهم اراميكس .. طبعاً انا استانست من خدمتهم وسرعه الرد منهم لكن يا فرحه ما تمت ! .. رحت اشيك اشوف فعلوا صندوقي ولا لا ما ما لقيت شي منهم آبد .. جتني منهم رساله بعد يومين يطلبون مني صوره لبطاقه الاحوال وارسلناها لهم على الايميل وعلموني انهم استلموها .. صبرت تقريباً حول الاسبوع ومليت منهم قلت بروح اشوف يمكن فتحولي الصندوق .. شيكت على الموقع ولقيت بيانات الصندوق الخاصه فيني .. هذي اللحظه صراحه عصبت منهم ليش يفتحون لي صندوق بعد اسبوع ولا يعلموني ؟؟

الزبده من كل كلامي لحد يشترك معهم من خلال موقعهم خدمتهم الالكترونيه سيئه

ربط فيزتي بحسابي في البآي بال :

تم الربط مع البآي بال بكل سهوله وسرعه .. عبيت البيانات عندهم ووصلتني رساله على الجوال فيها رمز التفعيل دخلت الرمز وفعلت حسابي .. جربت اشتري شي بالبآي بال لكن ما ضبط .. رحت اجيب شويه اغراض للبيت ورجعت قلت اشيك على حسابي الباي بال من جديد وهالمره ضبط .. كان محتاج شويه وقت عشان يتأكدون من صحه البيانات ويفعلون حسابي بشكل صحيح


الشراء من امازون :

كلمت اخوي وولد خالتي بخصوص الشراء من امازون عشان نشتري مره وحده لـ تخفيف تكلفه الشحن .. خذت متطلباتهم واضفتها الى سلة الشراء واتممت عمليه الشراء .. لكن للاسف رصيدي اصبح ما يكفي فدفعت لبعض الاشياء وبعضها لا وبالتالي امازون قسم اغراضي لشحنتين شحنه دفعتها وشحنه بعد ما دفعتها .. عبيت رصيدي ودفعت المتبقي

الشراء من آيباي :

ربطت حسابي البآي بال بـ حسابي في آيباي وتمت العمليه بنجاح .. وزاودت على سلعة قبل ما ينتهي وقتها وكسبتها

استلام الشحنات :

شحنت اغراضي في امازون من خلال الشحن العادي ( 3 - 5 ايام ) وشحنه خذت يوم وشحنه خذت اربع ايام عشان توصل بريدي في امريكا .. اللي دفعتها متأخر وصلت قبل



شحنتي اللي شريتها من البآي بال خذت 4 ايام لين وصلت بريدي في امريكا



شحنات امازون الاولى خذت 3 ايام والثانيه خذت 4 ايام عشان يوصلون الرياض ..



طبعا ما استلمت الاولى علطول لان جوالي كان مقفل وقتها دق علي موظف التوصيل من بكره وبينت له الامر وصار الامر افضل لي لاني استلمت الشحنتين كلها مع بعض .. طبعاً انا حاط وين ساكن في الموقع في آي حي فدق علي موظف التوصيل وقلت له وقف في المكان الفلاني وانا بجيك وبأخذ منك الاغراض وبوصفلك البيت في نفس الوقت .. وديته لبيتنا وخذت منه الشحنات وعطيته فلوسه

الشحنه الاولى وزنها 5.51 باوند وحسابها 205 ريال، الشحنه الثانيه وزنها 1.77 باوند وحسابها 100 ريال .. وهذي صور للشحنه عقب ما استلمتها :





شحنه الآيباي خذت 4 ايام عشان توصل الرياض والموظف جابها لحد باب بيتنا



الشحنه وزنها 2.18 باوند وحسابها مدري نسيت يا 100 او 135 ريال .. وهذي صور الشحنه عقب ما استلمتها :



اتمنى ان التدوينه او التقرير افادكم ولو بشي بسيط .. لكم ودي

Memento - تذكار

Memento

في العاده الافلام تبدا من البدايه الى النهايه لكن هالفلم يبدا بالعكس من النهايه الى البدايه ويحاول
يسرد لك الاحداث بالتتالي بالعكس ، سيدخلك الكثير من الغموض محاولاً تترتيب الاحداث ومحاولاً فهم
شخصية بطل الفلم ، الفلم صراحه ممل جداً بالنسبه لي لكن المخرج فكرته وقصة الفلم جداً مميزه
اعجبتني بعض المقاطع الموسيقيه اللي تدخلك في الارتباك والغموض ، الفلم تقييمه حالياً 8.7/10
في IMDb وانا اعطيه 7.5 لاني كنت اشعر بالملل وانا اشوفه .

Shutter Island - جزيرة شاتر

Shutter Island

مع اني ماحب الممثل Leonardo DiCaprio الا انه تمثيله بطل مره في هالفلم ضابط الدور ، طبعاً الفلم يحتوي على الكثير من
الغموض حتى انك ما راح تعرف وش القصه في النهايه ، حتى من زود فضولي رحت ابحث واقرا عن القصه وصار كل واحد يخرف
قصه وكل واحد يكذب الثاني يعني راح تعيش الجو معهم وتحط نفسك مكانهم وتسأل نفسك كيف صار كذا وكيف ما صار وتحلل
القصه بكيفك ، هذا اللي يعجبني في افلام الغموض الفلم فيه لقطات مب صاحيه وخياليه وخاصةً اذا كان عندك مسرح منزلي
مثلاً مقطع الحلم الاول مع زوجته جداً رائع وخيالي ، عندك المقطع يوم يهربون للمقبره تحت الصاعقه والامطار والاشجار تتساقط
حسيت ان الشجره بتطيح علي خخخخ ، وخفت مررره يوم اخر شي يقتل بالمسدس الصوت مره هادي ويوم يطلق بسم الله
تروعت طبعاً ما ودي اوضح من قتل عشان ما اخرب عليكم القصه ، الفلم فيه شوية رعب واثاره وفيه شوية رومنسية مع حرمته
فلم جداً رائع ونهايه يبيلها تفكير ، الفلم تقييمة حالياً 8.0/10 من IMDb ، شكراً لقرائتك

[تقرير] pcsx2 - محاكي البلايستيشن 2

بسم الله الرحمن الرحيم

مدخل ../

قديمك نديمك لو الجديد اغناك ، كم من لعبة اشتقت اليها واردت استرجاع ذكرياتك معها ، يا حليل ايام اول بس تشتري اللعبه بدون ما تتردد ولا شي كلها بـ 10 ريال ولا تحتري وتناظر تقاييم اللعبه فـ راس مالها 10 ريال . .
Devil May Cry |Resident Evil |Onimusha | God of War|Final Fantasy | الخ



Pcsx2 . . /

Pcsx2 من اقوى المحاكيات للـ ps2 قوةً وثباتاً ودعماً حالياً . نزلت آخر اصداره بتاريخ 29/5/10 ميلادي تحمل الرقم 0.9.7 وهي نسخه تجريبه (beta) ومع ذلك الا انها افضل نسخه نزلت بنظري مضافةً عليها الكثير من التحسينات والتعديلات ، ليس كذلك فقط فـ المحاكي مجاني ومفتوح المصدر .
موقع المحاكي للاستزاده - pcsx2.net



الشرح . . /

من الان اقول لكم الشرح فيه صور ومعلومات كبيره لكي يناسب الجميع المبتديئن وغيرهم ، يعني ان شاء الله الموضوع متكامل والكمال لله ، انصحك تجيب معك كاسة شاهي عشان تروق معنا لان الشرح شوي طويل وممل :



1 ] تحميل وتركيب DirectX® .

طبعاً من اساسيات المحاكي بل من اساسيات كل جهاز ان يحتوي على DirectX® ، طيب ماهو الدايركت اكس ؟ هذا يا طويل العمر برنامج هام جداً لتدعيم الرسوم والاصوات على نظام الويندوز ، وهو مهم لتشغيل الالعاب الثلاثيه الابعاد وغيرها . رابط التحميل هنا ، اذا حملته قم بتشغيله ثم سوف يطلب منك الموافقه ، وافق ثم سوف يطلب منك تحديد مسار مجلد فارغ لـ إفراغ محتويات البرنامج بهِ ، انشى مجلد جديد على سطح المكتب ثم ارجع للبرنامج وحدد مسار المجلد الجديد على سطح المكتب ووافق على ذلك ، الان اذهب الى المجلد وافتحه ثم قم بتشغيل DXSETUP.exe وثبته كآي برنامج آخر ، اضغط next كم مره الى ان ينتهي وبهكذا انتهينا من هذه الخطوه .


2 ] تحميل المحاكي والبيوس وتركيبهما .

تحميل آخر نسخه صدرت من هنا ، اذا حملته قم بتشغيله وثبته كآي برنامج آخر اضغط next كم مره الى ان ينتهي ، قد تطول عمليه التثبيت كما حدث معي فكن صبوراً ، بعدما ينتهي سوف تجد ايقونه المحاكي على سطح المكتب اضغط عليها بزر الفأره الايمن ثم Properties ثم من نافذة Shortcut اختر Advanced ، الان علم على Run as administrator ووافق ، فـبذلك جعلنا المحاكي يشتغل كـ مسؤول تلقائياً . الآن شغل المحاكي بالضغط على الايقونه بزر الفأره الايسر ضغطتان متتاليتان ثم اتبع الخطوات بـ الصور :









في هذه الخطوة يقولك اختر البيوس فـ كما تشاهد لا يوجد بيوس القائمه فارغه ، اضغط على Open in explorer



الآن سوف يفتح معك مجلد فارغ صغره الى شريط المهام ثم قم بتحميل هذا الملف (البيوس) بعد تحميله افرغ جميع محتويات البيوس الى المجلد الفارغ الذي قمت بتصغيره قبل قليل على شريط المهام ثم ارجع للمحاكي



بعد الضغط على Refresh list ستظهر البيوسات اختر احد منها حسب اللعبه التي لديك فلو لديك لعبه امريكيه اختر البيوس USA وهكذا ثم وافق وانتهينا من هذه الخطوه .


3 ] اعدادات المحاكي الاساسية .

بعدما تخلص من الخطوه السابقه رقم2 سوف تفتح معك نافذه المحاكي الآن المحاكي يحتاج الى اعدادات فقط :


أ ] تعديل اعدادت الفيديو (الجرافيكس) :
اذهب الى Config > Video > Plugin setting وافعل كما في الصورة .




ب ] تعديل اعدادت عصا التحكم .
اذهب الى الى Config > Controllers > Plugin setting ثم اختر التحكم (كيبورد ، عصا تحكم ) كما في الصوره ثم انتقل للنافذه Pad1 واضبط المفاتيح على على حسب ذوقك L1،L2،مثلث،مربع ، الخ




ج ] إنشاء المموري كارد وتهيئته :
اذهب الى Config > MemoryCards ثم حدد احد المموريات واضغط Create ثم تحدد نوع المموري ويفضل انه يكون اول نوع وتعلم عند Use NTFS compression on this card وتوافق . بعد ذلك نهيئ المموري كارد من نفس قائمة نظام البلايستيشن 2 عن طريق CDVD > No disc ثم تختار System > Boot CDVD ويفتح معك نظام البلايستشين 2 ، تختار Browser ثم تختار المموري وتعمل له فورمات عن طريق الموافقه الان اصبح المموري صالح للتخزين عليه .



4 ] اعدادات المحاكي الثانويه .

طبعاُ هذه الاعدادت ليست ضروريه دائماً او قد تختلف من لعبةٍ الى آخرى ، بمعنى آخر ليست ثابته وانما متغيره من لعبه الى آخرى وفائدتها تسريع او تحسيت اللعبه لكي تشتغل بشكل سليم وسريع ، سأتكلم عنها بشكل عام وسريع لان كل لعبه تحتاج قد تحتاج الى اعدادت خاصه فعليك تجريب الاعدادات اذا لم تشتغل تشتغل لعبتك بشكل سليم او اذا وجد بها بطئ او تعليق او بإمكانك البحث عن " اسم اللعبه pcsx2 " في الشيخ جوجل وستجد الاعدادت المناسبه للعبتك من تجارب احد الاعضاء في عالم الانترنت وانا انصح بهذه الطريقه .


أ ] Speedhacks ( هاكات التسريع ) -Config > Emulation Settings > نافذه Speedhacks
هذه القائمه تُتيح لك باللعب بإعدادات المحاكي واستغلالها في تحسين من جوده اللعبه وقد تكون العكس فتكون ضاره فتحدث لك المشاكل في اللعبه ، فعليك التأكد من كل صغيره وكبيرهفي هذه الاعدادت وانصح ان نجلب الاعدادت من تجارب احد الاعضاء الناجحه غيرك في عالم الانترنت ، ولا تُستخدم هذه الاعدادت الا اذا وجد بطئ وتعليق في اللعبه اما اذا لم يوجد مشاكل فقم بتعطيل جميع الاعدادات هذه حالاً .



ب ] Game Fixes ( مصلحات الالعاب ) - Config > Emulation Settings > نافذه Game Fixes
هذه الخاصيه تُتيح لك تصليح بعض الالعاب المحدده وعددها 8 العاب ، فإذا كنت تنوي اللعب بأحد هذه الالعاب فقم بتعليم الخاصيه الخاصه بها وسوف تشتغل معك بشكل سليم ، وانتبه لا تفعلها الا اذا كنت بحاجه لها لانها قد تسبب الضرر في الالعاب الآخرى .



ج ] Window ( إعدادات النافذه ) - Config > Emulation Settings > نافذه Window
من هنا يمكنك تحديد ابعاد نافذه اللعب التي ترغب بها ، ويمكنك ملء الشاشة فور بدء اللعب تقريباً هذا ما لدي حول هذه الخاصيه .



د ] (EE/IOP , VUs , GS) - Config > Emulation Settings > نافذه EE/IOPاو VUs او GS
جميعها قد تدخل في الاعدادات الثانويه لكن لا تقم بتغييرها ابداً الا من تجارب احد الاعضاء في عالم الانترنت او اذا كان لك خبرةً فيها .




5 ] التحكم بتشغيل اللعبه .

أ ] تحديد ملف الايزو ( اللعبة ) .
نذهب الى ونتأكد من تحديد CDVD > Iso ، ثمCDVD > Iso Selector > Browse وقم بختيار ملف الايزو ( اللعبة ) .


ب ] بدء تشغيل اللعبة .
بعد ما تطبق الخطوه السابقة [أ] ، تتأكد من تحديد CDVD > Iso ، ثم System > Boot CDVD وسوف تفتح لك نافذه اللعب .


ج ] ايقاف مؤقت للعب .
بمجرد ضغطك لمفتاح esc ريثما تلعب سيتم الايقاف المؤقت للعب .


د ] ايقاف نهائي للعب .
اضغط مفتاح esc ريثما تلعب سيتم الايقاف المؤقت للعب ، بعد ذلك اذهب System > Shutdown .


ه ] حفظ اللعب (Save) .
اضغط مفتاح esc ريثما تلعب سيتم الايقاف المؤقت للعب ،، بعد ذلك اذهب System > Save state واختر احد الخانات المراد حفظ اللعب عليها .


و ] تحميل اللعب (Load)
اضغط مفتاح esc ريثما تلعب سيتم الايقاف المؤقت للعب ،، بعد ذلك اذهب System > Load state واختر احد الخانات المراد تحميل اللعب عليها .



تجاربي . . /

Rouge Galaxy



اشتغلت بشكل ممتاز ، بالاول وجدت بها تعليق في بعض المناطق فـ استعنت بأحد تجارب الاعضاء في عالم الانترنت واستفدت منها فأصبحت تشتغل بشكل سليم مع التعديل البسيط على "هاكات التسريع" فأصبح معدل التشغيل يتراوح من 90% الى 100% اي ان هناك بطئ قليل جداً في بعض المناطق .
* كل واحد يضيف تجربته بالشكل اللي يعجبه ، ويخبرنا هل اشتغلت مع الاعددات الثانويه ام لا .
* سأضيف اي تجربه من تجاربي قريباً هنا .



ملاحظات . . /

* = ملف .
* = صوره .
* المحاكي يحتاج على جهاز بمواصفات عاليه او شبه عاليه ، بالنسبه لي انا هذي مواصفاتي وبعض الالعاب ما تشتغل الا بإعدادت ثانويه .
* الشرح مطبق على نظام وندوز فيستا باللغه الانجليزيه .
* بخصوص تحميل وحفظ اللعب انصحك تسويه بداخل اللعبه آي تحفظه على المموري كارد تجنباً لحصول اية اخطاء .
* بإمكانك مل الشاشة فور اللعب بالضغط على enter + alt .
* بإمكانك التقاط فيديو نافذه اللعب بالضغط على f12 فور اللعب ، وسيسمح لك بإختيار الاعدادت المناسبه لضغط الفيديو وتسجيله ، مع ذلك هذه الخطوه ستبطئ من تشغيل اللعبه فانصح باستخدمها للاجهزه ذات المواصفات العاليه .



مخرج . . /

المعلومات منها ما جُرب ومنها ما جُمع ، فإن أصبت فمن الله و ان اخطأت فمن نفسي و من الشيطان ، بالنسبة لي تقريبا هذا اول تقرير اسويه كبير شوي فأتمنى احصل ارائكم ونقدكم ، اي استفسار انا موجود حط ردك وسيتم الرد عليه بإذن الله .، دعواتكم . . جميع الحقوق محفوظه لي بالنسبه للشرح وحصري لـ adslgate ومدونتي ، ولا اسمح للنقل بدون ذكر المصدر .

Copyright © 2010