افلام رومنسيه شفتها هـ الاسبوع ~

رجعنا للمدرسه ورجعنا للافلام ، صار وقتي اكثر تنظيم مع المدرسه فـ كل يوم اخصص لي فلم تقريبا اشوفه
في الليل ، تك قدام الـ My lcd والفلم لازم يكون HD ، وزبط الشاهي وبطاطس ليز كبير < جوك
واشبك اللابتوب حقي على الشاشه بالـHDMI ، الحمدلله لابتوبي مكفي وموفي بس ناقصني مسرح منزلي
ان شاء الله قريب بطقلي واحد او يمكن اطق هيدفون محيطي . .





Pride And Prejudice

فلم رومنسي رائع جداً ولا فيه فلسفه ولا خرابيط ، الفلم مقتبس من روايه انجليزيه من الراويه Jane Austen‏
الفلم تقع احداثه بين عائله بريطانيه مكوونه من 5 فتيات ووالديهما يقع الحب بين 3 من الفتيات ، قصه الحب الرئيسيه تقع
بين الممثله Keira Knightley اللي مثلت لها افلام كثيره ابرزها Pirates of the Caribbean
وبين الممثل Matthew Macfadyen اللي اول مره اشوفه ، ما عليه يجي منه لان جاي دوره دايم كئيب وحزين
اذا كانك تشوف افلام رومنسيه فـ انصحك ما تفوت عليك هـالفلم آآبد . .





Let the Right One In

فلم فلم غبي ما ادري وشلون صنفوه مع الرومنسيه ، معليش بحرق لكم قصته لانه بايخ وما ابيكم تشوفونه زيي
ولد بزر عمره 12 سنه يحب بزره زييه ياليتها بزره كان عادي يحب مصاصه دماء < باللهي تجي ؟
بزر ما عنده اصدقاء ولا شي وناقص حنان فـ ما لقى الا هالبنت ياخذ منها حنان ، مب بنت بعد :)
الفلم بعد ما ينفع لبعض الناس فيه رعب ودماء يخلي الواحد يتقرف ، ولا من بياخته بعد الفلم سويدي
يعني انصحك انصحك لا تشوفه بتضيع وقتك مع الفلم ، صدق البزران ما ينعطون وجه :P





Spread

عاد هالفلم غلطت يوم اشوفه ، فلم دعاره ذا مب رومنسيه للممثل الكوميدي المعروف Ashton Kutcher
بحرق لكم بعد ذا قصته لاني ما انصحك تشوفه ، قصته يا طويل العمر الممثل الكوميدي ذا اللي شايف نفسه
مسافر برا بعيد عن اهله على ظن انه يدرس على ما اظن ، وهو اصلن مسافر يبحث عن الدعاره والمآوى
في نفس الوقت ، لعب على كم بنت وخلاها تطيح في حبه وبالمقابل ؟ بالمقابل يسكن عندها وتكد عليه بدون
ما تدري عنه انه خائن ، المهم في الاخير بدأ يتوب ولقا وحده زيه بالضبط تلعب على الرجال نفس قصته
عشان $$$ ، فـ حاول يشبك البنت ذي عشانه عجبته ومن نفس طبعه وبعد عدد من المحاولات بدو يحبون
بعض حب حقيقي وبدا الرجال بعدها يعقل ويحاول يعيش مع هالبنت بس البنت راحت وتزوجت واحد عشان $$
وبس ، الفلم مقبول لكن لا انصح بمشاهدته لا تضيع وقتك . .





The Painted Veil

الستار المطلي ، فلم ابداااع مرره مرره قصه رومنسيه حزينه جداً بغيت اصيح آخر الفلم < نصآب
التصوير حلو مره واسلوب الممثلين احلى ، الفلم عندي هذا متكامل من كله ناحيه بس اول الفلم احداثه سريعه
بعدين تبدآ الفله وقصه الحب بين الممثله Naomi Watts المبدعه و المبدع اكثر Edward Norton
ودي اتكلم اكثر بس اذا اعجبني فلم ما احب اتكلم عن القصه ابداً ابداً ، انصحك بـ مشاهدته بشده . .