Devil May Cry 5th Anniversary Collection - Unboxing

>


اول مره اسوي فيديو فلا تدققون واجد ، اول المقطع كنت مرتبك شوي بس الحمدلله عدت على خير
الموسيقى زرفتها او تقدرون تقولون اخترتها ع السريع من last.fm .. اتمنى يعجبك عملي :)

تعديل خط Gwibber ليناسب ستايلك الخاص

سلام عليكم

محد لاحظ غيري ان خط Gwibber كبير بزياده وماخذ مساحه على الفاضي ؟ المهم وانا قاعد ابحث عن حل في النت لقيت تدوينه حلوه واستعنت فيها بعد الله .. الطريقه بسيطه وراح تاخذ منك دقيقه بس :

افتح الترمنال والصق الامر التالي ثم اضغط انتر

gksudo gedit /usr/share/gwibber/ui/themes/ubuntu/main.css

راح يفتح لك مستند نصي وفيه بيانات .. في اول المستند يجب ان يكون كالتالي ( لاحظ التغير بين الكلام التالي وبين الكلام اللي في مستندك عشان تعرف وين تلصق الكلام )

* {
color: black;
font-size: 8pt;
font-family: Liberation Sans;
}

.imgbox {
-webkit-border-radius: 5px;
}

.tableBubble {
  width:100%;
}

بعدين اعمل حفظ للمستند ( save ) ثم اغلق النافذه ثم قم بتشغل Gwibber ولاحظ التغيير في الخط ..

بإمكانك تحط حجم الخط اللي تبيه في خانه font-size وتحط الخط اللي تبيه في خانه font-family
انا بالنسبه لي خليته حجم الخط 7 وطالع كيوت مره صغير :)

قبل

بعد

تقرير : تجربتي للشراء من الخارج من البدايه الى النهاية

سلام عليكم
التدوينه مقسمه لعده اقسام تسهيلاً لي وللقارئ بحيث بأمكانه قراءه ما يريد وترك ما يريد

فتح حساب في الراجحي :

قريت كثير ناس في المنتدى ( البوابه الرقمية ) يمدح في بنك الراجحي وسرعه فتحه للحساب واخراجه للفيزا .. بعد تجربتي لهم اتضح لي العكس تماماً .. اسرد لكم تجربتي من البدايه :

مريت لهم اول مره وانا ما عندي اي خلفيه عن فتح الحساب ولا آي شي .. مريت لمهم وسألت الموظف قالي لازم تخش الموقع وتعبي البيانات وتاخذ رقم الطلب اللي يجيك بعد ما تنتهي من عمليه تعبئه البيانات .. جيناهم اليوم الثاني وسألت الموظف قالي لازم من الساعه 9 الى 11 الصباح .. قلنا ما فيه مشكله جيناهم اليوم الثالث وعطيت رقم الطلب للموظف ودخله عنده بالكمبيوتر لكن العمليه ما نجحت الموظف يقول لي السستم عطلان حالياً تعال بكره .. جيناهم اليوم الرابع نفس المشكله السستم عطلان طلعت من نفس الفرع ورحت لفرع آخر ونفس المشكله السستم عطلان .. الموظف نفسه اللي في الفرع الآخر يقول تعال الاسبوع الجاي قلت طيب نصبر .. جيت الاسبوع القادم برقم طلب جديد ونفس المشكله يقولي السستم عطلان حاولت مع الموظف وبينت له المشكله وكذا وقالي تعال بعد الظهر واضبطك .. جيته بعد الظهر وبالفعل ضبطني ودخل البيانات الخاصه بي يدوياَ من خلال الكمبيوتر حقهم واخذ تقريبا حول النص ساعه واودعت في حسابي 100 ريال واستلمت البطاقه ..

اصدار بطاقه الفيزا مسبقه الدفع :

بعد ما فتحت حسابي في بنك الراجحي مباشرتاً توجهت للموظف وقلت له بقدم طلب لأصدار الفيزا لكن قالي لازم تصبر 24 ساعه لانك توك فاتح حساب .. جيتهم اليوم الثاني وكلمت الموظف وعبيت البيانات المطلوبه في الاستماره وقالي خلاص تعالي بكره .. جيتهم بكره الصبح وللاسف ما طلعت فيزتي قالي ما عليك تعال الظهر واضمن لك انها بتجيك .. جيته الظهر وبالفعل استلمت البطاقه وارتحت وخلصت منهم

طبعاً هالكلام صار معي في الفرع الموجود بالقرب من بيتنا اللي هم : العقيق ، الصحافه
وبالنسبه لنظامهم فيه اشياء ما سرتني مثل نظام موظفين الاستفسارت عندهم مافيه لا حجز ولا ارقام ولا شي .. تقعد وتحتري لين يقوم اللي في الكرسي مع الموظف وتروح لمه .. بعض الناس اللي يهديهم يجي متأخر ومطفي النور وعلطول يقعد ما يدري انه فيه ناس تحتري من زمان !
وبعض الموظفين الله يهديهم رافعن خشته يالله يتكلم معك واذا جيت تبي تستفسر منه ع السريع زبدلك وقالك اقعد .. يعني ما يعطيكياها بأسلوب ! .. طبعاً مب كلهم فيه ناس شفتهم حبيبن وخدموني وفيه بعضهم صارو يعرفون اخواني من زمان معنا في الحاره

فتح بريد مع اراميكس :

بعد ما طلعت فيزتي رحت اجرب اشترك في خدمه شيب آند شوب وتم الاشتراك معهم من خلال موقعهم الالكتروني ومن خلال الدفع بفيزتي اللي توني مطلعها .. تم الدفع مباشرتاً وتم الخصم من رصيدي وارسلولي رساله انهم استلموا فلوسهم اراميكس .. طبعاً انا استانست من خدمتهم وسرعه الرد منهم لكن يا فرحه ما تمت ! .. رحت اشيك اشوف فعلوا صندوقي ولا لا ما ما لقيت شي منهم آبد .. جتني منهم رساله بعد يومين يطلبون مني صوره لبطاقه الاحوال وارسلناها لهم على الايميل وعلموني انهم استلموها .. صبرت تقريباً حول الاسبوع ومليت منهم قلت بروح اشوف يمكن فتحولي الصندوق .. شيكت على الموقع ولقيت بيانات الصندوق الخاصه فيني .. هذي اللحظه صراحه عصبت منهم ليش يفتحون لي صندوق بعد اسبوع ولا يعلموني ؟؟

الزبده من كل كلامي لحد يشترك معهم من خلال موقعهم خدمتهم الالكترونيه سيئه

ربط فيزتي بحسابي في البآي بال :

تم الربط مع البآي بال بكل سهوله وسرعه .. عبيت البيانات عندهم ووصلتني رساله على الجوال فيها رمز التفعيل دخلت الرمز وفعلت حسابي .. جربت اشتري شي بالبآي بال لكن ما ضبط .. رحت اجيب شويه اغراض للبيت ورجعت قلت اشيك على حسابي الباي بال من جديد وهالمره ضبط .. كان محتاج شويه وقت عشان يتأكدون من صحه البيانات ويفعلون حسابي بشكل صحيح


الشراء من امازون :

كلمت اخوي وولد خالتي بخصوص الشراء من امازون عشان نشتري مره وحده لـ تخفيف تكلفه الشحن .. خذت متطلباتهم واضفتها الى سلة الشراء واتممت عمليه الشراء .. لكن للاسف رصيدي اصبح ما يكفي فدفعت لبعض الاشياء وبعضها لا وبالتالي امازون قسم اغراضي لشحنتين شحنه دفعتها وشحنه بعد ما دفعتها .. عبيت رصيدي ودفعت المتبقي

الشراء من آيباي :

ربطت حسابي البآي بال بـ حسابي في آيباي وتمت العمليه بنجاح .. وزاودت على سلعة قبل ما ينتهي وقتها وكسبتها

استلام الشحنات :

شحنت اغراضي في امازون من خلال الشحن العادي ( 3 - 5 ايام ) وشحنه خذت يوم وشحنه خذت اربع ايام عشان توصل بريدي في امريكا .. اللي دفعتها متأخر وصلت قبل



شحنتي اللي شريتها من البآي بال خذت 4 ايام لين وصلت بريدي في امريكا



شحنات امازون الاولى خذت 3 ايام والثانيه خذت 4 ايام عشان يوصلون الرياض ..



طبعا ما استلمت الاولى علطول لان جوالي كان مقفل وقتها دق علي موظف التوصيل من بكره وبينت له الامر وصار الامر افضل لي لاني استلمت الشحنتين كلها مع بعض .. طبعاً انا حاط وين ساكن في الموقع في آي حي فدق علي موظف التوصيل وقلت له وقف في المكان الفلاني وانا بجيك وبأخذ منك الاغراض وبوصفلك البيت في نفس الوقت .. وديته لبيتنا وخذت منه الشحنات وعطيته فلوسه

الشحنه الاولى وزنها 5.51 باوند وحسابها 205 ريال، الشحنه الثانيه وزنها 1.77 باوند وحسابها 100 ريال .. وهذي صور للشحنه عقب ما استلمتها :





شحنه الآيباي خذت 4 ايام عشان توصل الرياض والموظف جابها لحد باب بيتنا



الشحنه وزنها 2.18 باوند وحسابها مدري نسيت يا 100 او 135 ريال .. وهذي صور الشحنه عقب ما استلمتها :



اتمنى ان التدوينه او التقرير افادكم ولو بشي بسيط .. لكم ودي